பாளையங்கோட்டை திருவனந்தபுரம் சாலையில் உள்ள குலவணிகர்புரம் ரயில்வே கேட் பராமரிப்பு பணிகளுக்காக இன்று மீண்டும் மூடப்படுகிறது. கொரோனா கால தடுப்பு நடவடிக்கையாக தற்போது ஊரடங்கு நடைமுறைப்படுத்தப்பட்டுள்ள நிலையில் பல வழித்தடங்களில் ரயில் சேவையும் நிறுத்தப்பட்டுள்ளது. இதனால் ரயில்வே நிர்வாகம் இந்த சூழ்நிலையை பயன்படுத்தி ரயில் வழித்தடங்களில் பராமரிப்பு பணிகளை மேற்கொண்டு வருகிறது.
திருநெல்வேலி - திருச்செந்தூர் ரயில்வே பாதையில் மேற்கொள்ளப்பட்டு வரும் பராமரிப்பு பணிகள் காரணமாக, கடந்த 01/06/2021 ஆம் தேதி குலவணிகர்புரம் ரயில்வே கேட் மூடப்படும் என அறிவிக்கப்பட்ட நிலையில், அன்று பணிக்கு வர வேண்டிய ரயில்வே ஊழியர்களுக்கு கொரோனா தொற்று ஏற்பட்ட காரணத்தால் பராமரிப்பு பணிகள் மேற்கொள்ளப்படவில்லை. இந்நிலையில் இன்று 03/06/2021 காலை 8.00 மணி முதல் மாலை 6.00 மணி வரை குலவணிகர்புரம் ரயில்வே கேட் பராமரிப்பு பணிகள் காரணமாக, மூடப்படுவதாக ரயில்வே நிர்வாகம் தெரிவித்துள்ளது. இதனால் பொதுமக்கள் இன்று ஒருநாள் மாற்றுப்பாதையை பயன்படுத்திக்கொள்ள அறிவுறுத்தப்பட்டுள்ளது.
