தூத்துக்குடி மாவட்டம், திருச்செந்தூர் சுப்பிரமணிய சுவாமி திருக்கோவிலில் மாதத்திற்கு ஒருமுறை உண்டியல் எண்ணப்படுவது வழக்கம். நேற்று முன்தினம் ஜனவரி மாதத்திற்கான உண்டியல் காணிக்கை எண்ணும் பணி கோவில் தக்கார் இரா.கண்ணன் ஆதித்தன், இணை ஆணையர் (பொறுப்பு) குமரதுரை ஆகியோர் முன்னிலையில் கோவில் வளாகத்தில் உள்ள கோவிந்தம்மாள் ஆதித்தனார் திருமண மண்டபத்தில் நடைபெற்றது. இதில் ரூ.1 கோடியே 41 லட்சத்து 88 ஆயிரத்து 951 ரூபாய் ரொக்கப்பணமும், 940 கிராம் தங்கமும், 12 ஆயிரத்து 184 கிராம் வெள்ளியும், 87 வெளிநாட்டு நோட்டுகளும் காணிக்கையாக கிடைத்துள்ளதாக தெரிவிக்கப்பட்டுள்ளது. இந்த உண்டியல் எண்ணும் பணியில் தக்கார் பிரதிநிதியும், ஓய்வு பெற்ற கால்நடை துறை உதவி இயக்குனருமான பாலசுப்பிரமணிய ஆதித்தன், தூத்துக்குடி உதவி ஆணையர் ரோஜாலி சுமதா, அறநிலையத்துறை ஆய்வாளர்கள் செந்தில்நாயகி, இசக்கிசெல்வம், பொதுமக்கள் பிரதிநிதிகள் வேலாண்டி ஓதுவார், மோகன், சிவகாசி பதினென்சித்தர் மடம் குருகுலம் வேதபாடசாலை உழவார பணிக்குழுவினர் மற்றும் கோவில் பணியாளர்கள் ஈடுபட்டனர்.
